Од неодамна, фудбалскиот клуб Брегалница од Штип има нов сопственик, тоа е турскиот стопанственик Мурат Шамил Шен. За него се знае дека има искуство во менаџмент, бил генерален директор во Aseemas General Trading во Дубаи, а подоцна работел како генерален директор во Kadr Textile и Lesson GmbH во Германија.
Во Турција, Шен бил на високи менаџерски позиции, првенствено во големи брендови како Vakko и Sarar. Со обезбедување консултантски услуги и услуги за обука, стекнал богато менаџерско искуство во широк спектар на сектори и на домашниот и на меѓународниот пазар.
Мурат Шамил Шен е поранешен кошаркарски репрезентативец на Турција, а со успех настапувал за кошаркарскиот клуб Фенербахче од Истанбул и неколку клубови од Германија и Дубаи. Поради неговата љубов кон кошарката, во спортските кулоари во Штип се шпекулира дека тој е заинтересиран и за инвестирање во кошаркарскиот клуб Соколи од Штип, кој моментално настапува во втората по ранг кошаркарска лига во Македонија.
Освен во спортот, господинот Шен е заинтересиран и за инвестиција во областа на индустријата во Штип, а и други градови во Македонија, како што и сам изјави на прес-конференцијата на ФК Брегалница. Тој се почесто претстојува во нашата земја, испитувајки го пулсот за инвесиција тука во Македонија.
