Пожарот што вчера изби над Штип е изгаснат по интервенција на пожарникарите и доброволците, соопштија од Центарот за управување со кризи.
Во гаснењето учествувале екипи на Територијалната противпожарна единица (ТППЕ) Штип со 20 пожарникари и четири противпожарни возила, Доброволното противпожарно друштво (ДПД) Штип со 10 лица и четири возила, како и екипи од Кочани со две возила и шестмина пожарникари и од Свети Николе со една екипа.
Според Територијалната противпожарна единица во Штип, било интервенирано со неколку противпожарни камиони и со четири специјални теренски возила за гасење пожари затоа што беше опожарен непростапен предел каде гореле трева, грмушки, но во близина имало и пошумени појаси насадени со борова шума, лозови и овошни насади.
Во текот на ноќта пристигнале и територијални единици од Кавадарци, Свети Николе и Кочани. На опожарениот појас во должина од неколку стотина метри беше и градоначалникот на Штип, Иван Јорданов кој изјави дека во текот на ноќта мобилните проитвпожарни единици полека, но сигурно го гаселе пожарот и дка нема место за паника.
Истовремено, мобилниот штаб на Општина Штип бил во постојан контакт и со Дирекцијата за заштита и спасување (ДЗС) и Центарот за управување со кризи (ЦУК). Цела вечер опожарените места биле под контрола, а во текот на денот ќе се утврдува дали имало некакви штети и од што настанал пожарот.
