Заборавете на обичната тоалетна хартија, бидејќи сè повеќе земји во Европа се свртуваат кон решение кое е стандардно во Јапонија со години. Зборуваме за паметни тоалети, познати и како „вошлети“, кои користат млаз вода за интимна хигиена и нудат голем број дополнителни функции, од сушење со топол воздух до автоматско кревање на капакот.
Она што некогаш изгледаше како луксузен егзотик резервиран за Далечниот Исток, сега брзо се шири и на Запад. Прво се појавија во луксузни хотели како што се хотелот „Мејфер“ во Лондон, „Парк Хајат Париз-Вендом“ и „Мариот Сити Вест“ во Минхен, а потоа и во приватни домови, ресторани, па дури и на аеродроми.
Паметните тоалети, т.е. вошлети, се технолошки напредна верзија на класичното биде и користат млазници вода за чистење по дефекацијата. Нивната употреба се промовира како поефикасна, понежна за кожата и значително поеколошка алтернатива на традиционалната тоалетна хартија, која е стандард за лична хигиена во голем дел од светот повеќе од еден век.
Иако нивното присуство во западните земји сè уште не е широко распространето, интересот за овие уреди расте благодарение на виралните објави на социјалните мрежи, зголемената грижа за животната средина и желбата на корисниците да најдат решенија кои се понежни за чувствителна кожа.
Вошлетите можат да вклучуваат голем број напредни функции: контрола на температурата на водата, сушење на топол воздух, автоматско отворање и затворање на капакот. Нивната употреба се препорачува и од медицински причини, бидејќи бројни експерти и студии наведуваат дека употребата на вода е далеку поефикасна од хартијата во отстранувањето на бактериите и биолошките остатоци, како и во спречувањето на иритации и инфекции, особено кај луѓе со чувствителна кожа.
Една таква студија, објавена во 2022 година во Journal of Water, Sanitation and Hygiene for Developmen, покажа дека употребата на биде значително го намалува присуството на микроорганизми по дефекацијата, во споредба со исклучивото користење на тоалетна хартија.
Сепак, постојат голем број пречки за масовната примена на овие уреди на Запад. Една од главните е цената. Основните модели на тоалети во Шпанија и други делови од Европа чинат околу 1.200 евра, додека напредните, целосно интегрирани паметни тоалети достигнуваат цени помеѓу 3.000 и 7.000 евра. Покрај тоа, инсталацијата често бара дополнителни електрични приклучоци и адаптација на постоечката бања.
Исто така, не треба да се занемаруваат културните навики – длабоко вкоренетата навика за користење тоалетна хартија, како и непознавањето на функционирањето на овие уреди, го забавуваат прифаќањето на промените.
Во овој контекст, вошлетите се претставени како одржлива и хигиенски супериорна алтернатива, пренесува блиц.рс.
