Марс некогаш бил домаќин на океани и песочни брегови, многу различни од денешната пустинска, ледена и радијациона средина, покажува истражување на научници од Пен Стејт универзитетот во САД и Универзитетот Гуангжу во Кина.
Откриените „плажи“ се резултат на анализата на подземните снимки добиени од кинескиот ровер „Журонг“. Според овие податоци, кои потекнуваат од северните рамнини на Марс, многу веројатно се потврдува дека некогаш постоел океан, изјавува д-р Бенџамин Карденас, еден од авторите на истражувањето.
„Радарските снимки покажуваат дури и најмали промени во големината на седиментите, што укажува на присуство на плима и бранови кои биле активни во подолг период. Плажата се наоѓа меѓу плитка вода, воздух и копно, што на Земјата е една од средините каде животот започнал. Ова е одлично место за мисија која ќе истражува евентуални знаци на живот“, додава Карденас.
Истражувачите долго време расправале дали Марс некогаш имал океани, а ова откритие посочува на можноста од постоење на големи водни површини во минатото. Постои и доказ за присуство на реки и езера, а научниците сè повеќе сугерираат дека може да има течна вода под површината на „Црвената Планета“.
