38 нови случаи на ХИВ/СИДА во 2025, регистрирани 8 смртни случаи
Заклучно со 27 ноември 2025 година, во Македонија се пријавени 38 новорегистрирани лица со ХИВ/СИДА, што претставува инциденца од 2,1 на 100.000 жители – значително пониска од просекот во ЕУ/ЕЕА (5,3/100.000). Случаите се намалени за 25,5% во однос на истиот период во 2024 година, кога беа регистрирани 51 случај.
Од новите случаи оваа година, 15 се од Скопје. Регистрирани се 8 смртни случаи поврзани со СИДА. Од новозаболените, 37 се мажи, 1 е жена, со просечна возраст од 35 години.
Најзастапена е возраста 20–39 години, со 73,7% од сите нови случаи.
Препознаени ризик-фактори:
29 лица од МСМ популацијата
5 лица со хетеросексуална трансмисија
Македонија останува земја со ниска преваленца на ХИВ – од 1987 до сега се регистрирани 726 случаи, но 32% од нив во последните пет години, што покажува растечки тренд кај сексуално активната популација.
Антиретровирусната терапија значително го снижува нивото на смртност – во последната деценија изнесува 7,4%, во споредба со вкупната историска стапка од 18,2%.
