Два огромни континента се на пат кон судир и тоа се очекува порано и побрзо отколку што се предвидуваше. Австралија се наоѓа на неизбежна траекторија кон судир со Азија, а темпото на ова континентално придвижување се одвива побрзо отколку што многумина би очекувале.
Според професорот Жeнг-Сјанг Лиу од Универзитетот „Кертин“, ова тектонско движење не е далечен и апстрактен феномен. Тоа е веќе во тек и ќе има длабоки последици врз географијата, екосистемите, па дури и врз технолошките системи на планетата.
Додека Австралија се движи кон север, таа носи со себе сеизмичка активност, еколошки нарушувања и можност за формирање на нов суперконтинент во далечната иднина. Австралија патува кон север со брзина од околу 7 сантиметри годишно, што иако изгледа малку, со текот на милиони години резултира во значајно поместување.
Ова бавно придвижување е природна последица од движењето на тектонските плочи – процес што трае уште одделувањето на Австралија од Антарктикот пред околу 80 милиони години.
Последици од судирот
Движењето носи длабоки последици за иднината на Земјата. Како што австралискиот континент се придвижува кон Југоисточна Азија, сигурно е дека ќе се соочи со значителни геолошки сили. Очекувањата се дека континуираниот судир ќе предизвика масовна сеизмичка активност, вклучувајќи земјотреси и вулкански ерупции.
Со понатамошниот судир на плочите ќе се создадат нови планински венци, а постоечките раседи ќе станат поактивни. Оваа сеизмичка динамика може да доведе и до формирање на сосема нови геолошки структури кои со текот на времето би го промениле пејзажот.
Една од највозбудливите последици од оваа тектонска активност е можноста за создавање на нов суперконтинент. Според професорот Лиу, се верува дека Земјата се развива во циклусен образец, каде континентите прво се раздвојуваат, а потоа повторно се приближуваат еден кон друг.
Овој циклус, кој трае стотици милиони години, ги обликувал копнените маси од Пангеа до денешните континенти. Кога Австралија ќе се судри со Азија, можно е да настане нов суперконтинент, кој научниците веќе го нарекуваат Амазија.
Спојувањето на овие огромни копнени маси нема да биде мирен процес. Судирот ќе создаде, како што го опишува професорот Лиу, „огнен прстен“ околу новиот суперконтинент. Ова најверојатно ќе предизвика интензивна вулканска активност по должината на границите на судирот, со масовни геотермални нарушувања.
Во внатрешноста, климата на новиот суперконтинент ќе биде сосема различна од денешната. Огромни подрачја ќе станат суви. Оваа промена ќе ги преобликува екосистемите, ќе ја измени климата и ќе влијае на сè – од земјоделството до достапноста на вода во погодените региони.
