Во недела ќе се одржи првиот турнир на билјард клубот Штип за 2026 година, интересот е многу поголем во однос на минатата година. Како што вели Кире Донев од билјард клубот Штип за М Нет телевизија, подготовките за првиот турнир за 2026 година течат во најдобар ред, а се очекува повеќе од десет часа игра.
„Подготовките течат перфектно за 2026 година работи со полна пареа. Заинтересираноста е многу поголема од ланската година. Ова недела имаме прв турнир во Штип каде што веќе сите места се пополнети. Тоа многу не радува што оваа година да кажам, навистина има многу поголема заитересираност. Сега имаме една билјард маса се очекува пак да биде играта околу 12 до 13 часа. Стартуваме во недела во девет часот наутро, па се до завршувањето на турнирот, но сигурно ќе биде ќе биде 12 до 13 часа игра“, ни изјави Кире Донев.
Клубот останува посветен и со настап на Државното првенство, но штипјани ќе учествуваат и на меѓународни турнири, а интересот за овој спорт во Штип е се поголем, а клубот бележи нови членови. Како што вели Донев размислуваат клубот да се пресели и во поголеми простории, каде би имале можност за повеќе маси, а притоа ја истакна и поддршката која ја добиваат од општината и градоначалникот Иван Јорданов.
„Секако тоа, значи овде на Државно првенство останува секако да го играме во Скопје, планираме да учествуваме и на Балканско првенство, се прават планови да се оствари и тоа. Значи интересот е зголемен оваа година многу повеќе, значи имаме нови членови, што тоа не мотивира, многу радува и еве веќе со колегата Љупче Козарев разговараме, работиме на некоја идеја за отварање на поголемо место со повеќе маси. Исто така, голема благодарност и до општината и градоначалникот Иван Јорданов, значи и тие се сега вклучени во нашиот проект и се надеваме дека овој проект ќе порасне во нешто поголемо оваа година. Кај дамите реално се’ уште нема интересност, но еве пак ќе кажеме значи овој спорт не гледа граници за години, не гледа граници за пол, така да секој што е заинтересиран може слободно да не контактира, да дојде, значи ќе биде пречекан како што треба, објаснето ќе му биде се, значи секој што е заинтересиран може да учествува во се“, дополнува Донев.
Билјард клубот Штип е првиот професионален клуб за овој спорт во градот, кој со работа започна пред нешто повеќе од една година. Интересот е голем, членовите во клубот се зголемуваат, а веќе се размислува и за поголема просторија со повеќе маси, бидејќи постоечките простории веќе стануваа мали.
