Во недела (10.05) на градскиот стадион во Штип се игра дербито на втората македонска фудбалска лига и директен дуел за пласман во прва лига помеѓу домаќинот ФК Брегалница и гостите Шкендија од Арачиново.
Од управата на штипјани, ја повикуваат целата спортска јавност да дојдат, да дадат поддршка во најважниот натпревар од сезоната во кој може да се избори пласманот во прва лига.
Во првиот натпревар помеѓу овие две екипи одигран во населба Синѓелиќ, Скопје, беа видени немили и неспортски сцени, притисоци, закани и физички напади од страна на арачиновци. Од таборот на ФК Брегалница, повикуваат и апелираат на фер и коректно навивање и поддршка за сините момчиња.
Натпреварот ќе се одигра со почеток од 16:00 часот, а ФФМ го прогласи како натпревар со висок ризик, па присуството на редари и полициски формации ќе биде засилено. Исто така, најавено е и присуство на гостински навивачи.
