Во текот на вчерашниот ден, во просториите на Општина Штип, градоначалникот Иван Јорданов оствари прием на младите членови на Таеквондо клубот од Штип, кој за само една година од своето постоење веќе постигна исклучителни резултати – освојувајќи вкупно 18 медали на првиот таеквондо турнир организиран во Штип.
Градоначалникот Јорданов упати срдечни честитки до младите спортисти за нивната посветеност, труд и спортски дух, како и до докажаните тренери Сашко и Жарко Арсовски, кои со своето искуство и во каратето, сега бележат нови успеси и во оваа олимписка дисциплина.
„Таеквондото како олимписки спорт има суштинска улога во развојот на спортската култура во нашиот град. Тоа е дисциплина која ќе биде достоинствен промотор на Штип и Македонија на национално и меѓународно ниво,“ истакна Јорданов.
Во рамки на приемот, беше најавено дека Спортскиот центар „Џексон“ ќе биде ставен во функција до крајот на оваа година, со капацитет од 1.000 гледачи, а ќе биде наменет за сите спортски клубови и спортисти од Штип.
Градоначалникот упати порака до младите таленти дека континуираната посветеност и работа се клучни за успехот, а Општина Штип останува партнер и поддржувач на спортските иницијативи и развојот на младите. Воедно, Јорданов најави и нова инвестиција – изградба на специјализирана спортска сала за боречки вештини, која се очекува да биде реализирана во текот на 2026 година.
