Отворен јавен повик за финансиска поддршка на млади земјоделци – до 600.000 денари неповратен грант
Министерството за земјоделство, шумарство и водостопанство го објави Јавниот повик бр. 02/2025 за користење на средства од Програмата за финансиска поддршка во земјоделството и руралниот развој за 2025 година.
Повикот се однесува на Мерка 112 – Помош за млади земјоделци за започнување на земјоделска дејност. Финансиската поддршка изнесува до 600.000 денари по корисник, што претставува 100% покривање на направените трошоци.
Средствата ќе се исплаќаат на годишно ниво, во најмногу три рати, при што е предвидена и авансна исплата од 40% од вредноста на инвестицијата.
Кој може да аплицира?
Право на аплицирање имаат млади лица на возраст од 18 до 40 години, кои за прв пат започнуваат со земјоделска дејност, при што е потребно да бидат запишани во Единствениот регистар на земјоделски стопанства во последните 18 месеци.
Според министерот Цветан Трипуновски, со оваа мерка се создава услов за нова генерација земјоделци кои ќе придонесат кон зголемување на домашното производство и ќе ја направат Македонија земја извозник на квалитетна храна.
Приоритетни категории на апликанти:
Млади жени земјоделки
Членови на земјоделски задруги
Лица со завршено земјоделско или ветеринарно образование
Апликанти кои вложуваат во механизација, сточарство или преработувачка опрема
Рок и начин на аплицирање:
Пријавувањето се врши електронски, најдоцна до 9 мај 2025 година.
Оваа поддршка е дел од пошироката стратегија за подмладување на агросекторот и намалување на увозната зависност, велат од МЗШВ. Целта е да се создадат стабилни услови за развој на земјоделството, при што младите ќе добијат шанса за сигурна иднина во руралните средини.
