Во Основен суд Штип денеска почна судењето против 74-годишниот Денис Асанов, обвинет за убиство на 79-годишната Б.Н. од Штип. Обвинетиот Асанов не признава вина за делото што му се става на товар.
Убиството се случи лани, а дел од трупот на починатата жена беше пронајден закопан во дворот на куќата на обвинетиот. Според исказот кој го дал пред Основното јавно обвинителство Штип, мотивите биле љубомора и љубовни недоразбирања. По убиената жена се трагаше неколку дена, а исчезнувањето го пријави нејзината сестра.
Според податоците од МВР, на 24 октомври 2025 година, 84-годишната сестра на жртвата пријави дека Б.Н. се оддалечила од домот. На 10 ноември, по судска наредба, e извршен претрес во домот на обвинетиот Асанов, при што се пронајдени траги од крв и други предмети поврзани со убиството.
– По претресот, обвинетиот беше уапсен и му беше изречена мерка притвор. Дополнителните вештачења и разговори со обвинетиот доведоа до детално објаснување на начинот на извршување на кривичното дело, се наведува во соопштението на МВР објавено на 16 ноември 2025 година.
