Штип оваа година ќе биде домаќин на еден од најпознатите музички фестивали во земјава – „The Festival“. Градоначалникот на Општина Штип, Иван Јорданов, најави дека во наредните денови ќе биде официјално објавена фестивалската програма. Градот очекува наплив на посетители, што ќе придонесе за зголемен туристички и економски развој.
– Новитет оваа година за Штип е токму „The Festival“. Очекувам програмата да биде објавена во деновите што следуваат. Овој фестивал претставува значајна можност за нашиот град, бидејќи ќе бидеме домаќини на илјадници гости. За сите детали, јавноста ќе биде навремено информирана – изјави Јорданов.
Покрај овој музички настан, најавена е и богата програма во рамки на „Штипското културно лето“. Во текот на летните месеци, штипската публика ќе може да ужива во концерти, изложби, театарски претстави и програми за најмладите. Домот на млади и Домот на културата исто така ќе понудат свои содржини, а општината, како што истакна градоначалникот, останува силен поддржувач на ваквите културни манифестации.
– Во наредните недели ќе ја објавиме и програмата за „Штипското културно лето“. Уверен сум дека ќе го привлече вниманието на штипската јавност – додаде Јорданов.
