Леонард Лаудер, долгогодишниот лидер и наследник на светски познатиот козметички бренд „Есте Лаудер“, почина на 93-годишна возраст. Тој беше најстариот син на основачот на компанијата, Есте Лаудер, жената која ја претвори семејната работилница во глобално име за убавина.
Компанијата ја објави неговата смрт во саботата, без да наведе причина.
Лонард Лаудер е роден во Њујорк, син на Ести и Џозеф, унгарски еврејски имигранти. Неговата мајка го основала брендот Есте Лаудер во 1946 година и постепено го претворила во синоним за луксузна нега на лице и тело. Леонард се приклучил на семејниот бизнис во 1958 година, откако служел во американската морнарица и дипломирал на Универзитетот Колумбија.
„Моите години во морнарицата можеби не беа драматични, но беа формативни за мене“, напишал подоцна во билтенот на Американскиот поморски институт.
Леонард Лаудер го презеде раководството на компанијата во 1982 година и ја водеше како извршен директор до 1999 година, а потоа како претседател на одборот до 2009 година. За време на неговото раководство, компанијата помина низ клучна трансформација – од семеен бренд до глобален гигант.
