Утре (среда) со почеток од 19:30 часот, на шеталиштето Ванчо Прке во Штип ќе дефилира “Гитарска поворка во чест на Тоше”. Настанот е герила акција од организаторот, како увертира на трибјут концертот за Тоше Проески кој ќе се одржи на 21.август во Дом на млади во Штип.
Во “поворката” ќе учествуваат музичари, гитаристи, граѓани на Штип кои ќе интерпретираат композиции од нашата музичка икона Тоше Проески.
Организаторите ги повикуваат граѓаните на Штип утре слободно да се приклучат на поворката на “едносмерната” и да го збогатат настанот. Носењето на инструмент не е задолжително.
Ова ќе биде своевидна најава на големиот концерт следниот четврток, а денес пристигна веста дека специјален гостин на концертот ќе биде српската мега ѕвезда Александра Радовиќ.
