Марија Атанасова од Штип направи силен впечаток на Фестивалот на музика „Макфест“ не само со својата песна, туку и со уникатниот стајлинг и хуманост, што ја издвојува од останатите.
Таа се појави во необичен фустан, кој носи посебна порака.
Фустанот е целосно исцртан, а неговата цел е да помогне на деца со посебни потреби.
— Фустанот го изработи Модно студио „Бела“ од Штип, а во подготовката учествуваа дечињата од Астибова градинка и од дневните центри за деца со попреченост од Штип. Во текот на следната недела ќе објавиме наддавање за фустанот, а средствата ќе бидат донирани на децата со попреченост во Штип. Аукцијата ќе биде објавена на моите профили на социјалните мрежи, ни рече Марија и додаде:
— Одсекогаш сум сакала да помагам на најранливите категории и да се дружам со децата. Тие цртаа на фустанот. Атмосферата додека се работеше на фустанот ќе ми остане во спомен засекогаш, истакна Марија.
Оваа година, Марија беше единствената штипјанка што настапи на „Макфест“ и ја покажа својата хуманост. Таа настапи со песната „Ти си ми се“ и продолжува да студира музика на Универзитетот во Штип.
