Македонскиот офанзивец Бојан Миовски носи посебно емотивна приказна за вечерашниот натпревар на националниот тим против Велс кој од 20:45 часот се игра на арената „Тодор Проески“ во Скопје, во квалификациите за СП 2026.
Миовски ќе настапи во специјално дизајнирани копачки со македонското знаме, а ќе игра за сите лица кои на 16.03.2025 ги загубивме во ужасната трагедија во Кочани.
Низ емотивен спомен, Миовски вели дека во детството си ветил дека еден ден со цело срце ќе игра за Македонија, и еве го сега во дресот на својата земја…
“Секој човек има своја приказна и секој човек има свое животно патување. Навраќајќи се во моето детство додека ги држев моите први копачки, се сетив дека кажав нешто што длабоко посакував: ‘Еден ден со цело срце ќе играм за мојата земја’ и еве ме, по многу години, играм за Македонија, мојата земја, бисерот на Балканот“ – вели Бојан, и дополнува: „Овие специјализирани копачки имаат исклучително значење, со свето нешто – моето национално знаме и иницијалите на моето семејство. На денешниот натпревар за македонската репрезентација, ќе ги носам во чест и сеќавање за сите што ги загубивме на 16.03.2025 година, за сите кои се уште се борат за своите животи и за сите семејства. Нека почиваат во вечен мир упокоените души, сите мои молитви за повредените“.
