Реконструкција на Ургентниот центар и модернизација на апаратурата во вредност од над 100 милиони денари за Клиничката болница во Штип, најави директорот д-р Владко Захариев:
Следната градежна активност е адаптација на модуларната болница за амбулантите од Мој Термин. Во скоро време ќе започне процедурата за реконструкција на Ургентниот центар. Планираме и други реконструкции, како што е обновата на кровот на Инфективното одделение, а во блиска иднина се очекува реконструкција на физикалната терапија. Ќе се подобрат и условите за амбулантите и соблекувалните за пациентите. Овие се градежните активности кои ги имаме во план за оваа година, истакнува Захариев.
Во однос на новата апаратура, акцентот ќе биде ставен на неколку клучни уреди:
Чекаме одобрение за распишување на јавна набавка за дензинометар, апарат за дијагностика на остеопороза. Исто така, ќе бидат набавени апарати за анестезија и интензивно лекување, апарати за операција, респиратори и транспортни респиратори, како и многу други апарати планирани за 2025 година. Вкупната вредност на сите овие апарати ќе изнесува над 100 милиони денари, истакнува Захариев.
