Со авион Ц-27 на грчкото воено воздухопловство ноќеска од Скопје во Атина се префрлени уште четворица повредени во пожарот во Кочани, јави дописничката на МИА од Атина.
Според информациите на МИА, станува збор за четири лица со изгореници кои ќе бидат хоспитализирани во воена болница во Атина.
Воениот авион од Атина полета вчера вечерта околу 22.30 часот по локално време за Скопје, а откако ги презема повредените веднаш се врати на воениот аеродром во грчката престолнина.
На ист начин завчера вечерта беа пренесени три лица, кои се во Општата воената болница 401 и како што претходно објави МИА се во релативно добра состојба, а станува збор за млади лица на возраст од 22 до 24 години, кои во пожарот се здобиле со изгореници.
Со четворицата повредени кои во Атина рано утрово пристигнаа, вкупниот број на хоспитализирани во Грција ќе биде 12, петмина во Солун (тројца во болницата Папаниколау, двајца во воената болница 424) и седуммина во воени болници во Атина.
