Поднесено е барање до Кошаркарската федерација на Северна Македонија (КФСМ) за свикување на вонредно собрание на кое ќе се гласа за смена на претседателот Перо Антиќ.
Иницијативата за смена на Антиќ во вторникот ја поднесе поранешниот репрезентативец Младен Ѓуровски, кој има поддршка од 37 членови на Собранието на КФСМ. Бројката значи апсолутно мнозинство, односно над трипати повеќе од потребниот број.
Кошаркарската федерација мора да закаже вонредно собрание во рок од две недели, а доколку тоа не се случи, иницијаторите имаат право сами да го организираат.
Претседателот на КФСМ веќе еднаш беше соочен со силен отпор кон крајот на минатата година, но тогаш успеа да ја задржи функцијата преку правни механизми. Сепак, на 29 март официјално истекоа две години од неговиот втор мандат, со што повеќе нема формални пречки за негова смена.
