Сè уште се наоѓаме во период на широка распространетост на грипот и заболувања слични на грип, иако во изминатите две недели се забележа благо намалување. Според последниот неделен извештај на Институтот за јавно здравје (ИЈЗ), регистрирани се 3.035 нови случаи, што претставува зголемување од 11,3 проценти во споредба со претходната недела.
„Во однос на сезоната, забележуваме зголемување на вкупниот број на заболени од грип во споредба со претходната сезона и со просекот. Ова се должи, најпрвин, на некои мутации на вирусот, но секоја сезона има свои специфичности. Клучно е да се продолжи со почитување на основните мерки за превенција на респираторни заболувања, како што е грипот“, изјави д-р Драган Кочински, раководител на Одделот за епидемиологија во ИЈЗ.
Најголем број на случаи се регистрирани во Скопје – 620, Куманово – 374, Битола – 306 и Тетово – 176.
„Во текот на минатата недела, најголем број на заболени се регистрирани кај популацијата од 15 до 64 години, но најпогодени се децата од 0 до 4 години и од 5 до 14 години, како што е случајот низ целата сезона. За време на последната недела, регистриран е и еден смртен случај асоциран со грип. Станува збор за 78-годишно лице од Скопје, кое било хоспитализирано на Универзитетската клиника за пулмологија, со присутни коморбидитети и без вакцинација против сезонски грип“, додава д-р Кочински.
Во моментов, на Инфективната клиника се хоспитализирани пет пациенти со потврдена инфлуенца. Сите се возрасни лица над 65 години, со коморбидитети, и сите се невакцинирани против сезонски грип.
„Граѓаните треба да ги почитуваат препораките на здравствените работници, да избегнуваат контакти со заболени лица и подолг престој во простории со голем број на луѓе. Ако забележат симптоми кои асоцираат на грип, треба да останат дома и да не го изложуваат ризикот другите“, додава Кочински.
