Министерството за здравство денеска соопшти дека, според информациите добиени од Воено Медицинската Академија (ВМА) во Белград, претпладнево почина Стојанче Стефанов од Кочани, роден во 2001 година.
Стефанов беше еден од најтешко повредените во трагичниот пожар кој избувна во дискотеката „Пулс“ во Кочани, а кој досега однесе 62 животи.
„Станува збор за пациент кој уште од првиот ден беше во критична состојба и веднаш беше транспортиран на лекување во ВМА – Белград. Беше интубиран и се наоѓаше на апарат за ЕКМО (екстракорпорална мембранска оксигенација), заради сериозните повреди на дишните патишта и вдишаниот чад“, информираат од Министерството.
Стефанов имал 27% изгореници и сериозни компликации, поради што неговата состојба останала нестабилна целиот период од хоспитализацијата. Беше опериран на 4 април, но, за жал, не успеа да се избори со последиците од повредите.
Министерството за здравство изрази најдлабоко сочувство до семејството, пријателите и сите засегнати од оваа голема трагедија.
