Општина Штип објави јавен повик за пријавување проекти и програми за 41. издание на манифестацијата „Штипско културно лето“. Повикот е наменет за сите заинтересирани субјекти од областа на културата кои сакаат да земат учество во најстарата културна манифестација во општината.
Со повикот се бараат содржини што ќе одговорат на традицијата и реномето на „Штипско културно лето“, кое со децении претставува значаен културен белег на градот.
Пријавувањето се врши со пополнување на пријавен лист (формулар), кој треба да се достави во архивата на Општина Штип најдоцна до 6 април 2026 година. Нецелосно пополнетите пријави нема да бидат разгледувани.
Годинешното, 41. издание на „Штипско културно лето“ ќе се одржи во вообичаениот термин – од последната недела на јуни до крајот на јули 2026 година.
За дополнителни информации, заинтересираните можат да се обратат кај Кирил Панајотов на телефон 078 47 26 99.
