15-годишниот Овен Купер е новото лице на актерската сцена. Тој дебитира во серијата „Адолесценција“ на „Нетфликс“ и ги воодушеви гледачите. Кога беше на аудиција за серијата, имаше 13 години и немаше никакво актерско искуство, иако многумина поради неговата убедливост би помислиле дека станува збор за искусен професионалец.
Креаторот на серијата, Стивен Греам, го избрал Овен од 500 момчиња што се пријавиле на аудицијата. Освен што има уникатни способности во актерството, Греам открил една од главните причини зошто го ангажирал токму Купер.
Креаторот сакал некој од работничката класа
– Се обидуваме да создадеме можности пред и зад камерата за деца од работничката класа или за оние што инаку не би имале такви можности. Сакаме некој нов и некој кој не е навикнат на начинот на кој работиме – изјави Греам.
Неговиот инстинкт бил добар – Купер бил толку убедлив во портретирањето на Џејми Милер што веднаш по серијата ја добил улогата на младиот Хитклиф во новата адаптација на „Оркански височини“, каде што колешка ќе му биде Маргот Роби.
Сѐ почест тренд на вработување неискусни тинејџери
Медиумскиот експерт Чад Теиксеирија вели дека ова станува сѐ почест тренд. Избирањето актери без актерска заднина обезбедува реалистично прикажување на одредена заедница, што доведува до возбудливо искуство при гледањето на серијата или филмот.
– Пред неколку години патот до Холивуд (или барем британската драма) беше поплочен со години обука на Академијата за драмски уметности во Лондон, Шекспирови монолози и одбивања од Националниот театар за млади. Но денес? Потребно е само убедливо лице, интригантна приказна и способност да изгледате нерасположено пред камера – вели Теиксерија.
Тој смета дека публиката е жедна за нешто поинакво.
– Видовме премногу извежбани изведби. Сега сакаме да му веруваме на актерот. Сакаме неуреден, ненапишан шарм. Сакаме да се чувствуваме како да ѕиркаме во реалниот живот, а не како да гледаме некој што поминал години усовршувајќи го својот акцент – додава Чад.
Иако неискусните актери често добиваат пофалби, Теиксеирија предупредува дека оваа метода не секогаш дава резултати.
– Секако, овој пристап не успева секогаш. Понекогаш се гледа недостигот на искуство. Постои причина зошто актерите со години вежбаат – затоа што актерството е вештина. Но, кога успева, навистина успева. Нема сомнеж во магијата кога гледате некој што никогаш не глумел како апсолутно ја поседува улогата, како да е роден за неа. И да бидеме искрени, постои нешто возбудливо во идејата дека некој преку ноќ може да премине од продавач во продавница до главна улога во филм – заклучува Овен.
