„Мета“ ја проширува употребата на вештачката интелигенција за идентификување малолетници на „Инстаграм“ и во некои случаи ќе започне автоматски да ги менува поставките на нивните профили.
„Мета“ веќе некое време користи вештачка интелигенција за препознавање корисници под 18 години на „Инстаграм“, потпирајќи се на разни „траги“. На пример, ако некој му честита на корисникот „среќен 16. роденден“ преку пораки, или ако се забележат обрасци на користење на социјалните мрежи типични за тинејџерите.
Доколку „Мета“ открие дека малолетник лаже за својата возраст, тогаш ќе го замоли да ја потврди возраста. Но, благодарение на новата промена, сега автоматски ќе се применуваат рестриктивни поставки на профилот на корисникот, без оглед на датумот на раѓање наведен на профилот.
Ова значи дека нивниот профил ќе стане приватен, непознати луѓе нема да можат да им испраќаат пораки, а содржината што ја гледаат ќе биде дополнително филтрирана.
„Мета“ вели дека корисниците последователно ќе можат да ги променат поставките, доколку сметаат дека имало грешка во процената на возраста.
