Македонските ентузијасти и истражувачи на птици ќе имаат ново виртуелно место каде ќе можат да учат и споделуваат знаења за видовите птици.
Неколку десетици граѓани, вљубеници во природата и птиците се собраа вчера во Нетавил во Скопје на промоцијата за новиот сајт за прибирање податоци за птици „ptici.mk“.
На настанот, своја презентација имаше заменик-директорот на Македонското еколошко друштво, орнитологот Методија Велевски, кој раскажа за идејата и процесот на создавање на оваа платформа, прва од својот вид во Македонија, а објасни и како граѓаните може да внесуваат податоци на платформата.
Настанот беше одлична можност за македонските истражувачи на птици – професионалци и аматери да се соберат на едно место и да ги споделат своите искуства, знаења, а секако и да ги кажат своите предлози за идни подобрувања на платформата за птици.
„ptici.mk е замислена како платформа за поддршка на растечкиот број на набљудувачи, истражувачи и фотографи на птици, со што се придонесува кон унапредување на граѓанската наука. Апликацијата бара основно предзнаење во препознавање на птици, но е доволно лесна да ги предизвика и почетниците набљудувачи да ја користат, учат и да ги забележуваат птиците кои се наоѓаат околу нив” – изјави Данка Узунова, орнитолог и проектен координатор во МЕД.
Платформата континуирано се надградува – во моментов се состои од динамичен веб сајт на кој се прикажуваат наодите на птиците, и Android апликација за собирање на податоци. За во блиска иднина е предвидена и апликација за iOS, но приоритетот ни е овозможување целосна функционалност на Android апликацијата, која во овој момент може да се преземе само од овој сајт, но набрзо ќе се најде и на Google Play.
Платформата е одржувана од Македонското еколошко друштво, преку поддршка од Sigrid Rausing Trust и проектот „Подобрување на можностите на Европскиот портал за птици за унапредување на придонесот кон политиките на ЕУ изнесени во Директивата за птици и 2030 Стратегијата за биолошка разновидност (LIFE22-PLP-ES-EBP reinforcement)” финансиран од Европската Унија.
