Автомобилот Zastava 101 е создаден врз основа на тогашниот технички многу модерен Fiat 128, со малку изменет заден дел и беше еден од првите автомобили произведени во хечбек варијантата што преовладува денес.
Пет врати тогаш беа реткост, а Zastava 101 беше привлечна за купувачите поради дизајнерскиот пробив, но и поради поволната цена.
Овој модел брзо стана најпродаваното возило на Zastava во поранешна Југославија, а поради пристапната цена постигна значителен извозен успех, пред сè во источноевропските земји, но и во целиот свет.
Facebook страницата „Zastava 101 forum“ објави исечок од магазинот AVTO објавен во далечната 1972 година, практично на самиот почеток на продажбата на овој модел, во кој се наведува дека тогашната цена била 40.040 динари, односно 2.084 долари.
Кога ќе се земе предвид инфлацијата за претходните 50 години, се доаѓа до бројката дека денес Zastava 101 би чинел точно 16.179 долари, односно 14.953 евра.
