Тамара Тодевска и продуцентот Роберт Билбилов ја преработија „Време за плачење“, хитот на Игор Џамбазов со кој на Макфест во 1992 го освои второто место.
„Некои песни се безвременски. Остануваат засекогаш, како сведоци на времето во кое се создадени, носејќи во себе универзална порака за сите времиња. Најмногу кога душата искината на парчиња непреболно тагува. Тогаш кога емоциите го надвладуваат разумот, кога болката го гушнала траорот, а молкот царува во прегратките на тишината, тогаш веројатно најсилно одекнува песната која во себе носи стихови кои имаат само едно значење: време (е) за плачење“, вели Тодевска.
Оваа песна симболично ја промовира пред нејзиниот хуманитарен концерт кој ќе се одржи на 8 мај во Младинскиот културен центар, а парите од продадените билети ќе одат за семејствата на настраданите во пожарот во Кочани на 16 март, во кој загинаа 62 лица, а 193 се повредени.
„‘Време за плачење’ е како симболика на мигот во кој се најдовме, во времето кое и после толку години никако да покаже каде (по)греши(в)ме, за најскапата цена сѐ уште да ја плаќамe“, велат Тодевска и Билбилов.
Новата верзија на старата латино тема е клавирска анплагд балада.
Музиката и текстот на оригиналната песна се на Томислав Которчевиќ, а новата верзија е издадена преку светски познатата музичка етикета „Кафе де Анатолија“. Видеото, кое е црно-бело, е во режија на Зоран Зонде Стојановски. Новата верзија на „Време за плачење” е достапна на сите дигитални платформи.
