Двајца од хоспитализираните 29 лица во Клиниката за хируршки болести „Св. Наум Охридски“ по пожарот во дискотека во Кочани се на респиратор, а останатите се во стабилна состојба која постојано се следи оти се менува од час во час. Директорот на болницата, Небојша Настов, вели дека има уште двајца повредени на кои може да им треба респираторна поддршка.
„Засега двајца се на респиратор, но има уште двајца кои потенцијално може да завршат на респиратор во текот на денот и оставам простор евентуално да се влоши состојбата кај некој друг. Со надеж дека тоа нема да се случи. 29 пациенти се вкупно примени. Возраста е од 17 до 45 години. Се прави обработка на изгорениците, примарно отстранување на девитализираното ткиво. Заради тоа што во првиот момент не можете да видите кое ткиво е девитализирано, се прават преврски секој ден или секои два дена и се увидува потреба од отстранување на девитализираното ткиво. Изгорениците тргнуваат од 5-6% стигнуваат до 60% “, вели директорот Настов.
Тој објасни дека има пациенти кои вдишале чад, но и пламен.
„Работата е во тоа што најголемиот дел од изгорениците се во пределот на главата, на вратот и лицето, што подразбира дека најверојатно дошло до вдишување како на гасови така и на пламен. Не можеме да бидеме децидни во моментов колкумина ќе имаат потреба од респиратор“, вели директорот Настов.
Во овој момент, според него, нема барање за лекување во приватни болници или во странство. Понуда за помош на болниците директорот Настов вели дека имаат од Бугарија и од Србија. Евалуацијата на пациентите најави дека ќе ја прават на дневна база, ако има потреба и од час на час и подготвени се доколку има потреба да ги спремат пациентите и да ги испратат на лекување надвор од земјава.
