Заврши уписот на првачиња во основните училишта во Штип. Истиот траеше еден месец од 1 до 31 мај. Во петте основни училишта на територија на Општина Штип запишани се 326 ученика, но се очекува оваа бројка да порасне до крајот на август бидејќи дел од родителите тогаш си запишуваат своите деца во прво одделение. Најмногу првачиња до сега се запишани во ООУ „Ванчо Прќе“ во Штип.
„Мајскиот уписен рок заврши, ова е всушност и единствениот рок, но и во август се дозволува за оние родители кои не ги запишале децата да ги запишат. На територијата на Општина Штип се запишани вкупно 326 ученика во петте основни училишта.“ – вели Санева.
Оваа година се очекува најголемо почитување и на реонизацијата, согласно промената на Законот за основно образование. Дополнително се очекува поголем број запишани првачиња, бидејќи основните училишта нудат квалитетна настава, но и соодветни услови за одржување на наставата.
„Тоа најмногу се должи на промената на Законот за основно образование во кој е јасно прецизирано под кои услови е дозволена реонизацијата. Тоа се многу малку услови така што секој родител треба да го запише детето онаму каде што припаѓа“ – додава Санева.
Во учебната 2025/26 година се запишуваат децата родени од 01.01.2019 година до 31.12.2019 година. Согласно Законот за основно образование можат да се запишат и децата родени од 01 до 31 јануари 2020 година.
