Во чест на својот 80-годишен јубилеј, оркестарот на Македонската филхармонија, приреди исклучителна музичка вечер во Виена.
Во срцето на градот што со векови претставува синоним на културата, уметноста и класичната музика, македонските музичари одржаа извонреден концерт, кој ја претстави нашата музичка традиција во најдобро светло.
Концертот се одржа во престижната Златна сала на Музикферајн, еден од најпознатите и најценетите концертни храмови во светот, каде што настапуваат водечките светски оркестри и диригенти. Оркестарот на Македонската филхармонија на посетителите им понуди сеанса исполнета со страст и емоции, а нејзиното музичко совршенство беше повод за гордост и потврда на нејзиниот професионализам, квалитет и уметничка зрелост.
ЕВН Македонија, како долгогодишен поддржувач и промотор на културните иницијативи, го поддржа ова незаборавно музичко уживање, потврдувајќи ја својата посветеност кон развојот и промоцијата на културните вредности во меѓународни рамки. Поддршката на вакви настани е дел од континуираната посветеност на компанијата да инвестира во уметноста, образованието и културното наследство.
Виена, град во кој се роди и се негуваше класичната музика, уште од времето на Моцарт, Бетовен и Штраус, и претставува вистински симбол на европската музичка традиција, имаше прилика да ужива во настапот на солистите Ана и Игор Дурловски, под диригентство на Јерухам Шаровски. Овој музички перформанс, кој понуди внимателно одбран репертоар, обединувајќи дела од македонската и европската класична музика, ја импресионираше виенската публика, позната по својот префинет музички вкус. Изведбите на композициите на Глигор Смокварски, Бете Илин и петте традиционални македонски песни во аранжман на Сони Петровски беа пречекани со долги аплаузи и стоечки овации од виенската публика, позната по својот префинет музички вкус.
Настапот во Виена е значаен момент во историјата на Македонската филхармонија и е потврда дека македонската уметност достојно го зазема своето место на европската и светската музичка мапа.
