Но, иако AI моделите често нè олеснуваат во извршувањето на секојдневните обврски, нивната употреба носи и извесни ризици, особено кога станува збор за заштитата на личните податоци и приватноста.
Во брзањето да завршиме некоја задача, честопати им споделуваме на четботовите доверливи и чувствителни информации што не би ги кажале ниту на непознат човек. А иако не се луѓе, AI моделите треба да се третираат како такви – она што не би му го кажале на случаен минувач, не треба да го внесувате ниту во разговор со четбот.
Компаниите што ги развиваат овие модели обично тврдат дека разговорите не се користат за дополнително обучување на моделите – иако има исклучоци, како DeepSeek. Сепак, тоа не значи дека информациите исчезнуваат. Разговорите остануваат зачувани во историјата на вашиот кориснички профил, а секој што ќе седне пред вашиот компјутер може да им пристапи.
Што никогаш не треба да му кажете на ChatGPT (или на било кој друг AI модел)?
1. Лични податоци
Никогаш не внесувајте име и презиме, адреса на живеење, матичен број, број на лична карта, пасош или фотографии од документи. Ако ви треба помош за пишување биографија, побарајте шаблон што ќе го пополните самостојно.
2. Финансиски информации
Податоци за банкарски сметки, кредитни картички или електронско банкарство се апсолутно неприфатливи за споделување со AI. Дури и ако барате совет за кредит или даночни олеснувања, користете измислен пример.
3. Лозинки
Не споделувајте лозинки, токени или други безбедносни податоци. Како што не би му дале клуч од стан на странец, така не треба ни на вештачка интелигенција.
4. Чувствителни или доверливи информации
AI не е пријател што чува тајни. Приватни детали за семејство, партнери, здравствени состојби или колеги не треба да бидат дел од разговорот со четбот.
5. Податоци за компанијата каде што работите или соработувате
Иако звучи практично да побарате ChatGPT да ви напише договор врз база на податоци од компанијата, тоа може да биде сериозен безбедносен пропуст. Прототипи, патенти, финансиски планови или внатрешни документи – сето тоа треба да остане надвор од AI моделите.
6. Експлицитна или ризична содржина
Дури и ако е на шега, прашања како „како да се ослободам од некого засекогаш“ можат да предизвикаат сериозни последици. Некои четботови можат дури и да ги пријават ваквите содржини.
7. Медицински податоци
Иако ChatGPT може да помогне со објаснување на медицински термини, никогаш не внесувајте резултати со лични податоци. Поставувајте прашања во општа форма, на пример: „Кои вежби се препорачуваат за маж во триесетите со ишијас?“
Златно правило:
Ако не сте сигурни дали треба да внесете некоја информација во разговор со вештачка интелигенција, запрашајте се: „Би ми било ли пријатно ова да се појави на интернет или во медиумите?“ Ако одговорот е „не“, тогаш не го внесувајте ниту во четботот.
