Македонската православна црква и нејзините верници в сабота, на 8 ноември, го празнуваат Митровден, односно Свети Димитриј, кој се смета за еден од најголемите семејни празници во Македонија.
Народот верува дека на овој ден може да се предвиди како ќе биде зимата. Според народното предание, ако на Митровден има мраз, се очекува долга и студена зима со многу снег.
Според народните обичаи, на вечерта пред Митровден и Ѓурѓовден секој треба да биде дома, затоа што оној кој тогаш ќе преспие надвор од својот дом, се верува дека цела година ќе ноќева по туѓи куќи. Токму овој обичај се смета за најважното верување поврзано со Митровден.
Во многу краеви на Македонија се верува и дека на Митровден не треба да се караат децата, без разлика колку погрешиле, затоа што се верува дека тогаш ќе бидат непослушни цела година.
Дали на Митровден се пости?
Овој празник во црковниот календар е означен со црвени букви, а со оглед на тоа што оваа година паѓа в сабота, Митровден не се празнува посно. Секој празник што паѓа в среда или петок е постен, како и оние што се празнуваат за време на Големиот пост.
