Градскиот совет на Љубљана изгласал забрана на спонтани улични настапи со музички инструменти, а одлуката ќе важи до крајот на декември.
Предлогот дојде од самиот градоначалник Зоран Јанковиќ и стапува на сила веднаш, со што популарните „трубачи“ се отстрануваат од улиците на словенечката престолнина, пренесе „24ur.com“.
Охрабрување од опозициската клупа
Целата дебата беше поттикната од прашањето на градската советничка на СДС, Маруша Бабник. Таа предупредила дека Љубљана, за разлика од другите европски градови кои гордо го истакнуваат своето културно наследство и поставуваат сцени на Христовото раѓање, Словенија не ја цени доволно сопствената традиција за време на празничната сезона.
„За време на празничната сезона, општина Љубљана дозволува фаворизирање на балканска музика, „трубачи“, кои немаат никаква врска со Љубљана, словенечкиот културен идентитет и божиќната традиција“, рекла Бабник, верувајќи дека градот се срами од сопствената култура.
Од друга страна, заменик-директорката за туризам на Љубљана, Ана Лампиќ, ја бранела програмата на градот. Таа нагласила дека истата вклучува многу настани од словенечката традиција, како што се Миклавчева поворка, сцената на раѓањето на Исус Христос и божиќниот концерт. „Посетителите ја доживуваат Љубљана како отворена, жива и културно богата европска престолнина. Уличните музичари, вклучувајќи ги и трубачите, не се дел од официјалната декемвриска програма“, нагласила Лампиќ.
Брзо гласање
По дискусијата, градоначалникот Јанковиќ одлучил да пресече. Тој предложил одлука за забрана на спонтани улични настапи и веднаш повикал на гласање, што предизвикало забуна кај советниците. „Сега ќе имаме гласање за забрана на трубачи, да биде јасно“, рекол тој.
Гласањето било повторено на барање на советниците, а одлуката на крајот била донесена со 25 гласа „за“ и шест „против“. „Тоа не значи дека можат да бидат на едниот крај два часа, а потоа на другиот. Сега повеќе не смеат да настапуваат“, објаснил Јанковиќ, додавајќи дека градскиот инспекторат веќе изрекол казни за некои музичари.
Обвинувања за нетолеранција
Одлуката не поминала без критики. Градскиот советник од партијата „Весна“, Денис Стриковиќ, тврдел дека гласањето е неважечко бидејќи таква забрана може да се воведе само со измена на постојната одлука, а не со таков заклучок. Тој ја нарекол целата постапка нетолеранција кон трубачите.
Јанковиќ ги отфрлил приговорите, објаснувајќи дека не станува збор за промена на одлуката за посебна намена на јавни површини, туку за заклучок што е во согласност со неа и што постојната одлука го овозможува.
