Секој што набљудувал молња за време на грмотевици знае колку овој природен феномен предизвикува и страв и восхит. Ударите од гром се меѓу најдеструктивните појави за живите суштества, а нивното точно предвидување и денес претставува сериозен предизвик. Постоечките безбедносни мерки не секогаш се ефикасни — но јапонската телекомуникациска компанија „Нипон Телеграф енд Телефон Корпорејшн“ (НТТ) смисли нов и невообичаен пристап.
Компанијата објави дека за прв пат во светот успеала да активира удар од гром користејќи дрон и промените во електричното поле. Дронот, дизајниран со специјален заштитен кафез што издржува директни удари од молња, може да стане основа за побезбедна инфраструктура во урбани средини.
Според податоците на НТТ, штетите предизвикани од гром во Јапонија годишно достигнуваат од 100 до 200 милијарди јени (околу 650 милиони до над 1,3 милијарди американски долари). Тоа ја нагласува потребата од нови и поефикасни методи за заштита, особено таму каде што традиционалните громобрани не се применливи — како кај ветерни турбини или на отворени простори.
Токму затоа, НТТ започна со истражување на можностите за користење беспилотни летала за насочување на ударите од гром.
Новата технологија се базира на лансирање дрон кон грмежлив облак, со цел да се активира молња и безбедно да се насочи подалеку од чувствителни објекти.
Од декември 2024 до јануари 2025, тимот спроведе експеримент во планински предел кај градот Хамада, во префектурата Шимане.
Дронот летал на надморска височина од 900 метри, опремен со сензори за следење на електричното поле. На 13 декември, кога бил идентификуван активен облак, дронот бил поврзан со електричен прекинувач на земјата и успешно предизвикал молња. Ударот само делумно го стопил заштитниот кафез, а дронот останал недопрен.
Кафезот, направен од спроводлив метал, ја насочува електричната енергија и ја распрскува молњата радијално, со што се намалува и магнетното влијание. При тестирање со вештачки молњи, дронот издржал и удари до 150 килоампери — дури пет пати посилни од просечен природен гром.
Во иднина, НТТ планира да го унапреди системот, да работи на подобро предвидување на молњи и потенцијално да ја искористува нивната енергија.
