Легендарната црна гитара „Black Strat“ на David Gilmour, долгогодишниот гитарист на култниот рок-бенд Pink Floyd, испиша ново поглавје во музичката историја. На аукција во Њујорк инструментот беше продаден за неверојатни 14,6 милиони долари, со што стана најскапиот музички инструмент од овој тип некогаш продаден.
Оваа препознатлива црна гитара, позната меѓу фановите како „Black Strat“, беше верен придружник на Гилмор во периодот од 1970 до 1983 година. Со неа беа снимени дел од најзначајните албуми во историјата на рок музиката, меѓу кои и легендарните The Dark Side of the Moon, Wish You Were Here и The Wall – изданија кои и денес се сметаат за темел на модерната рок култура. Аукцијата ја организираше познатата куќа Christie’s, каде наддавањето траело 21 минута и предизвикало огромен интерес кај колекционерите. Иако првичните проценки беа дека гитарата ќе достигне цена меѓу два и четири милиони долари, финалната сума ги надмина сите очекувања. Идентитетот на купувачот засега останува непознат.
„Black Strat“ беше дел од богатата колекција на американскиот милијардер Jim Irsay, познат колекционер на историски музички инструменти и предмети од поп-културата, кој почина минатата година. На истата аукција внимание привлече и пијаното на John Lennon, продадено за 3,2 милиони долари, што претставува една од највисоките суми платени за предмет поврзан со легендарната група The Beatles.
Со оваа продажба беше надминат и претходниот рекорд кој го држеше акустичната гитара на Kurt Cobain, користена на познатиот настап на MTV Unplugged, продадена во 2020 година за шест милиони долари. На последната аукција се појави и неговиот син „Fender Mustang“, познат од спотот за песната Smells Like Teen Spirit, кој достигна цена од 6,9 милиони долари.
Со секој ваков предмет, велат од аукциската куќа, не се продава само инструмент – туку и дел од историјата на музиката.
