Со песна и свечен говор, вчеравечер беше промовирана книгата „Штипско Ново Село“ од авторите Трајан Јанинков, Борис Балабанов и Петар Пиков во исполнетата сала на штипската библиотека Гоце Делчев. Книгата претставува вреден запис за историјата, духовноста и луѓето на Ново Село – мала кои со векови го чуваат духот и традицијата на Штип.
На промоцијата присуствуваа претставници од Општина Штип, бројни сограѓани, како и многу новоселци кои со гордост ги споделија спомените за своето маало. Публиката со внимание ги следеше зборовите на авторите, кои со голема љубов и посветеност го опишале животот, луѓето и приказните што ја обликувале оваа штипска населба.
Вечерта помина во атмосфера исполнета со емоции, спомени и чувство на припадност, а делото „Штипско Ново Село“ останува траен белег на културното и духовното наследство на градот. На авторите им беше упатена искрена благодарност за нивниот труд и љубов кон родниот крај, а на сите присутни – благодарност што со своето присуство ја збогатија оваа убаво организирана вечер.
