Селекторот на македонската фудбалска репрезентација, Благоја Милевски, го објави списокот со повикани фудбалери за контролниот натпревар против Летонија кој се игра на 13. ноември на домашен терен и за мечот со Велс во Кардиф, кој се игра на 18. ноември.
Селекторот Милевски нема да може да смета на повредениот Езѓан Алиоски, а пак во репрезентацијата повратници се Бојан Димоски, Кристијан Трапановски и Лирим Ќамили.
Повикани голмани се Столе Димитриевски, Дејан Илиев, Дамјан Шишковски и Игор Алексовски. Во одбраната ќе бидат Висар Муслиу, Никола Серафимов, Ѓоко Зајков, Бојан Димоски, Андреј Стојчевски, Дарко Велковски, Стефан Деспотовски, Бојан Илиевски и Стефан Ашковски.
Во средниот ред ќе бидат Енис Барди, Јани Атанасов, Елиф Елмас, Исник Алими, Лука Станковски, Тихомир Костадинов, Решат Рамадани и Давид Бабунски.
Во нападот на македонската репрезентација ќе бидат Бојан Миовски, Милан Ристовски, Дарко Чурлинов, Александар Трајковски, Елмин Растодер, Кристијан Трапановски и Лирим Ќамили.
Собирот на македонската репрезентација е закажан за 10. ноември. Во нашата квалификациска група прва е Белгија со 14 бодови, но меч помалку во однос на Македонија која е втора со 13 бодови, а пак Велс е трет со 10 бодови, но со меч помалку. Казахстан е четврти со 7 бодови, а на дното е Лихтенштајн без бодови и со меч помалку.
