Во новата година со подобар стандард

0

Животниот стандард ќе се подобрува и во 2016-та година. Се зголемува минималната плата, повисоки примања ќе има во здравството, околу 300 илјади пензионери ќе добијат зголемени пензии за 5 отсто, студентите и средношколците веќе почнаа да ги користат бенефициите за бесплатен превоз, жичарницата, имаат бесплатен влез во културните објекти, анализира ЛИДЕР.

pari-denari

За 8 години, пензиите зголемени за 70%

Статистиката покажува дека пензиите во изминативе осум години се зголемени за цели 70 проценти, а најдрастичен раст има кај минималната пензија. Годинава ќе има нова нагорна корекција, со што просечната пензија ќе достигне нешто над 13 илјади и 700 денари. Последните податоци на Фондот за пензиско осигурување покажуваат дека во земјава има 300.047 пензионери, кои во 2016-та ќе добијат повеќе пари, со што ќе им се подобри животниот стандард. Ако се има предвид дека пензионерите се категорија граѓани кои своите примања ги трошат дома, а не во странство, економската логика вели дека треба да се очекува зголемена потрошувачка и динамизирање на економијата.

„Се работи за сума пари преку која може да се влезе во процес на потрошувачка на стоки за широка употреба, што ќе предизвика вкупна зголемена побарувачка и ќе се манифестира во зголемено производство“ – објаснува универзитетскиот професор Томе Неновски.

Почнаа да важат мерките за младите

Од 2016-та почна да важи проектот за бесплатен превоз на редовните студенти од државните факултети со градските автобуси. Бесплатниот превоз се однесува на сите линии. Пресметките покажуваат дека студентите на месечно ниво ќе заштедат околу илјада денари. Освен превоз, студентите добиваат и подобро сместување, бидејќи во тек е проектот за реконструкција на студентските домови. Годинава со буџетот е планирано и зголемување на вкупната сума за студентски стипендии, и тоа за 11 милиони евра.

Освен за студентите, бенефиции има и за средношколците. Тие секоја среда можат бесплатно да ја користат железницата, жичарницата, да влезат во кино, театар, музеј и слични културни установи.

Се зголемува минималната плата

Годинава продолжува етапното зголемување на минималната плата, проект кој стартуваше пред три години.

Минимална плата                  година
8.050 денари                              2013
8.800 денари                              2014
9.590 денари                              2015
10.080 денари                            2016

Од 1 јануари, за сите индустрии, освен во текстилната и во кожарската индустрија, минималниот износ е 10.080 денари. Усогласувањето со овие две индустрии треба да се реализира до 2018-та година. Фирмите кои не го почитуваат Законот се казнуваат со казни од 8 до 9 илјади евра, плус 4 до 5 илјади евра глоба за одговорното лице.

„Убеден сум дека овој износ што е заеднички утврден меѓу работодавачите и синдикатите, со посредство на Владата, во рамки на економско – социјалниот совет, е износ кој не ги загрозува работните места на работниците. Владата во овој дијалог ги вложи своите потенцијали за да помогне во балансирањето на правата и интересите меѓу засегнатите, и да послужи како гарант за успешно завршена работа меѓу синдикатите и работодавачите“ – рече премиерот Груевски, откако се постигна договорот меѓу социјалните партнери.

Здравствените работници со повеќе пари в џеб

Со повеќе пари в џеб ќе бидат и здравствените работници. Предвидена е зголемена капитација за стоматолозите и матичните лекари, а дел од здравствените работници ќе добијат и повисоки плати. На пример, капитациониот бод за матичните стоматолози се зголемува за 14 проценти, односно од Фондот по пациент ќе добиваат по 40 денари.

“Средствата се обезбеден од буџетот на Фондот, а фискалната импликација во делот на зголемувањето на капитацијата за стоматолозите изнесува 75,3 милиони денари годишно“ – вели директорот на Фондот, Сашо Стефановски.

Повеќе од 500 здравствените работници со завршено високо образование, како медицински сестри, рендген техничари, физиотерапевти, лаборанти, од февруари добиваат додаток на платата како вреднување на стекнатото образование, со цел да се стимулираат во работењето. Анексот на Колективниот договор е веќе потпишан.

„Договорот стапува на сила со февруарска плата, која ќе биде реализирана со корекција на коефициентот. Вкупниот процес на корекцијата на платата е 36,9 отсто“ – вели Љубиша Каранфиловски од Самостојниот синдикат за здравство, фармација и социјална заштита.

Сподели.


Коментарите се затворени.

Feedback

FLYERb